Биа туйяс пыр

Мунӧны олӧмсьыс Ыджыд войнаса ветеранъяс. Сы кузьта Мыс сиктын татшӧм мортыс ӧти и коли — Дмитрий Степанович Паршуков. Оз ёна радейт ошйысьны фронтöвöй туйяснас вӧвлӧм салдат, та вӧсна быттьӧ казявтӧмӧн и кольӧ. А ӧд казьтывлынысӧ эм мый. Кык «За отвагу» да «За боевые заслуги» медальяслӧн кавалер ӧні на новлӧдлӧ чужӧмас кӧрт тор. А ранитчывліс 1945 вося январ 19 лунӧ. Таӧдз сылӧн военнöй ордым муніс Молотовскӧй обласьтса Ягры ді пыр, кӧні велӧдісны лыйсьыны 45 миллиметра пушкаӧн, сэсся Коломна кар пыр, кӧні лоис миномётлӧн наводчикӧн нин. Мӧвпыштліс-ӧ прöстöй коми зон, мый та бӧрын ковмас тышкасьны Курскöй мегыр вылын, мездыны вӧрӧгысь Украина да Молдавия, Закарпатье да Румыния. А ранитчис Польшаын нин, Варшава босьтігӧн. Осколокъяс чорыда дойдісны сойсӧ, юрсӧ, чужӧмсӧ. Май тӧлысьӧдз лои туплясьны госпитальясын, нулісны весиг Арменияӧдз. Сэсянь и демобилизуйтісны кыдзи инвалидӧс. Öти кӧрт тор сэсся петіс вир-яйсьыс гортас воӧм бӧрын нин.

Войнаӧдзыс Дмитрий Паршуков уджаліс Немдінса МТС-ын, медводз отсасис видзны вӧвъясӧс, сэсся механизатораліс. А фронт вылысь бергӧдчӧм мысти недыр бурдӧдчыштіс и пыр жӧ аддзис выль удж. Вӧлі клубса веськӧдлысьӧн, библиотекарӧн, вот чукӧртысь агентӧн, судса заседательӧн. Пуксьывліс и машина руль сайӧ — сиктса мортыд тай абу велалӧма овны весяс.

Öні Дмитрий Степанович горт олӧ ӧтнас, кӧзяйкаыс, Öртем Öндрей Лидия, кодкӧд лӧсьӧдлісны куим челядьӧс, кувсьыліс нин. Ыджыд керкасӧ кутӧ бур кӧзяин моз. Дерт, тшӧкыда пыравлӧны и ас сиктсаяс. Кодсюрӧ эськӧ босьтчыласны юасьны кольӧм война йылысь, но ветеран, оз кӧ пöрöд стопка-мӧд, абу ёна кыввора. Тыдалӧ, сьӧкыд жӧ выль пӧв нуӧдны сьӧлӧм пырыд ставсӧ, мый аддзывліс-вуджӧдіс кузь фронтöвöй туйяс вылас.

Парма гор, 2002, Декабр 3 лун.